Axenda cultural do IES Ponteceso

Axenda cultural do IES de Ponteceso

Benvidos ao noso blog co que intentaremos achegarvos á actividade cultural dende o noso centro.

martes, 27 de decembro de 2011

Gran éxito da campaña de lectura de Nadal

Queremos darlle as grazas a todas as persoas que fixeron posible esta bonita campaña de “agasallos” en forma de recomendacións lectoras (ao profesorado que se animou a participar, a toda a rapazada que pouquiño a pouco foi facendo medrar a ilusión dos regalos e a Marga, profesora do IES As Mariñas quen xentilmente nos prestou a idea .
 Case chegamos aos 140 préstamos, o ano que vén iremos a polos 200!!!

FELICES LECTURAS.

xoves, 22 de decembro de 2011

"Quen poidera namorala"

Hoxe o noso personaxe homenaxeado por excelencia- Don Álvaro Cunqueiro- cumpriría 100 anos e para celebralo que mellor cousa que a versión musical dun dos seus poemas máis coñecidos  grazas a un médico e cantautor de Moraña, Luis Emilio Batallán, e que moitos dos profes recoñecemos como unha especie de banda sonora da nosa xuventude.
Para gozar.

 
(Cantiga nova que se chama Riveira, 1933. Álvaro Cunqueiro)
No niño novo do vento
hai unha pomba dourada,
meu amigo!
Quén poidera namorala!

Canta ao luar e ao mencer
en frauta de verde olivo.
Quén poidera namorala,
meu amigo!

Ten áers de frol recente,
cousas de recén casada,
meu amigo!
Quén poidera namorala!

Tamén ten sombra de sombra
e andar primeiro de río.
quén poidera namorala,
meu amigo!

luns, 19 de decembro de 2011

Ano Cunqueiro (1911-2011)

Con motivo da celebración do nacemento deste magnífico escritor galego teñen lugar en moitos lugares de Galicia sentidos homenaxes á súa figura literaria.  Hoxe inauguramos a nosa pequena exposición na biblioteca que fai un percorrido pola biografía e polos diversos xéneros literarios que con tanta fortuna cultivou Don Álvaro Cunqueiro, así mesmo,  os nosos alumnos de 2º de Bacharelato terán a ocasión de asistir a un evento no salón de actos da Fundación Eduardo Pondal  no que o profesor César Morán realizará unha animación musical arredor da figura do escritor.
Gustaríanos tamén que lle botarades unha ollada a esta presentación realizada por Elvira Roiz e tomada da  Biblioteca "Saturnino Hermida" do I.E.S. Concepción Arenal (Ferrol). Compartindo, coma sempre, que é moi san, esperamos que gocedes dela e que vos sexa útil.C
View more presentations or Upload your own.

venres, 16 de decembro de 2011

A imaxe do día

Na biblioteca calquera recuncho é bo para ler ou estudar no recreo...

                                    Incluso debaixo da escaleira!!!!!

xoves, 15 de decembro de 2011

Graciñas, Rosalía!

Di o refrán “quen sementa, recolle” . Na biblioteca do IES sentímonos orgullosos de presentarvos unha achega dunha antiga alumna, ROSALÍA REGUEIRO MÉNDEZ, licenciada en historia, quen xenerosamente regálanos un exemplar de “Vixiados. Represión e vixilancia na Galiza da Guerra Civil (1936-39), editado por Emilio Grandío. Precisamente, un dos capítulos desta obra:”Fichados. Un estudo de caso: O índice alfabético-onomástico de investigados-informados pola delegación de Orden Público ( A Coruña, 1938)” é froito da investigación levada a cabo por Rosalía ( e da que agardamos, nun futuro próximo, sexa o xermolo da súa tese de doutoramento).
Animámosvos a que lle botedes unha ollada ( se cadra, o profe de historia de España vos pregunta algo que veña nel…) e a que se sabedes dalgún/ha alumno/a que teña publicado algún traballo que o comparta con todos nós, que a biblioteca necesita libros pero , sobre todo, xente que se encariñe ( e que faga encariñar) cos(aos) libros.

mércores, 14 de decembro de 2011

Agora que imos cara o inverno, unha de exploradores.

Roald Amundsen chega ao Polo Sur tal día como hoxe hai 100 anos. Así foi , o explorador noruegués Roald Engelbregt Gravning Amundsen (Borge, Noruega, 16 de xullo de 1872 - Mar de Barents, 18 de xuño de 1928) dirixiu unha expedición á Antártida en 1911 e alcanzou o Polo Sur por vez primeira o 14 de decembro aínda que non se soubo do seu achado ata un ano despois cando o equipo chegou a Australia (o fallo de non ter teléfonos móbiles). A famosa expedición viaxou nun navío chamado Fram e contou coa inestimable axuda de cans groenlandeses que facían o transporte de víveres e demais material do campamento.

En tempos de frío, por que non deleitarnos con algunha destas aventuras polares xunto cunha cunquiña de chocolate quente?

Desgraciadamente na biblioteca non contamos co libro escrito por Amundsen trala súa viaxe: El Polo Sur: un informe de la expedición antártica noruega en el "Fram", 1910-1912, pero si que contamos cun par de xoias que relatan aventuras similares:
Shackleton da editorial Geoplaneta e Con Scott al Polo, da editorial Planeta, ámbolos dous libros na sección de VIAXES (910).

luns, 12 de decembro de 2011

Nova edición do X&Q

Presentámosvos un novo número do boletín da biblioteca, o X&Q, no que vos damos puntual información sobre acontecementos culturais que se deron no noso país así como eventos que tiveron lugar no noso centro, recomendacións literarias, conmemoracións, concursos e moitas cousas máis. Se non fostes quen de facervos cunha copia, aquí tendes a versión virtual.

sábado, 10 de decembro de 2011

Día dos Dereitos Humanos


Baixo esta imaxe tedes a ligazón á páxina da ONU que fala do porqué da celebración deste día. Na nosa biblioteca queremos sumarnos a esta importante celebración cunha lista de recursos que vos poden ser interesantes:


xoves, 8 de decembro de 2011

125 Aniversario do nacemento do pintor Diego Rivera


Tal día como hoxe nace en Guanajuato , México hai 125 anos o pintor e muralista Diego Rivera. Formado en distintos países europeos na época cubista, abandona esta corrente artística en aras dunha estética que estivera máis acorde cos ideais revolucionarios da súa patria . É por iso coñecido como autor de soberbios murais de temática social e tamén, co tempo, pola súa relación coa tamén famosa pintora mexicana Frida Kahlo.

Deixamos aquí un vídeo que mostra algunhas das súas mellores obras.

luns, 5 de decembro de 2011

Campaña de lectura de Nadal: "Regáloche un libro"

Tódolos anos rompémonos a cabeza para conseguir , non que vos acheguedes á biblio, que xa o facedes, senón que vos levedes algún título para casa nestas épocas de lecer: guías de lectura, profes pesadísimos que vos intentan comelo coco, exposicións… se cadra algún cae, pero... este ano encontramos a fórmula máxica: “REGALAR” libros da biblio!!!! Quen se pode resistir a tan sutil agasallo?
Lede as instrucións para facer un pouco máis feliz a quen máis vos apeteza: compañeir@s, profesores, pais ou nais… Tod@s merecen un anaquiño da vosa atención.
Ah! e grazas á biblioteca "As Mariñas" de Betanzos pola fantástica idea.

domingo, 4 de decembro de 2011

NICANOR PARRA: Premio Cervantes 2011

A voltas cos premios, estamos outra vez aquí para falar do máis alto galardón que se concede nas letras hispánicas: O Premio Cervantes. Nesta ocasión, e en paralelo co que sucede con José Luis Sampedro, trátase dun escritor cuxa profesión dista moito do que se podería esperar dun profesional das letras. Nicanor Parra Sandoval é un matemático e físico chileno de 97 anos e creador da antipoesía, fervente defensor do folklore do seu país e ecoloxista convencido. Pertence a unha saga de artistas e creadores, a súa irmá foi a famosa cantantautora Violeta Parra, e tanto os seu pais como os seus fillos están vencellados dalgún xeito ao mundo das artes.

Durante medio siglo

La poesía fue

El paraíso del tonto solemne.

Hasta que vine yo

Y me instalé con mi montaña rusa.

Suban, si les parece.

Claro que yo no respondo si bajan

Echando sangre por boca y narices.