NAMÓRAME: Concurso de "marcapáxinas"

Un ano máis recibimos o Día dos Namorados cunha idea orixinal: queremos decorar a biblioteca cunha chuvia de "marcapáxinas" que leven unha mensaxe de amor.
Ti tamén podes namorarnos coa túa proposta. Velaiquí tes as BASES do concurso.
namórame

30 de xaneiro: Día da Paz

Con motivo do día da paz o noso centro quere aportar un pequeno gran de area cunha exposición dos libros máis relevantes cos que contamos entre os nosos fondos relacionados co tema xunto cunhas breves recensións sobre eles para intentar concienciar á nosa comunidade da importancia que un mundo en paz ten para o normal desenvolvemento da nosa sociedade.
Celebramos este acontecemento o día no que un dos maiores pacifistas do mundo Mahatma Gandhi foi asasinado por un fanático hinduísta. Acompañamos este texto cun vídeo que o Seminario Galego de Educación para a Paz fixo para celebrar o seu 25 aniversario no 2010 e unha curta de ficción “POR NADA” premiada en moitos festivais sobre o tan importante tema do “ciberacoso” .

A gran verdade sobre os Reis Magos...

Os olores de nadal: PREMIOS

Velaiquí tedes as fotos cos premiados polas espléndidas descricións que realmente nos transportaron aos arrecendos destas datas. Mariña Abella de 2º Bac. co seu fermoso conto, Ángel Blanco de 1º da ESO coa súa simpática rima, Dina Souto de 1º de Bac coa súa tenra descrición e todos os rapaces e rapazas que axudaron a construír unha árbore tan olorosa fixéronnos un pouco máis felices.

Un rato de biblioteca moi especial

A falta de recursos realmente aguza o enxeño, e este vídeo é unha boa proba de como a cultura pode chegar a todas partes cunha pinga de solidaridade e intelixencia. Ver para crer.

OS OLORES DE NADAL

Axiña chega o Nadal , xa parece que arrecende a vieiras, ameixas, doces, polvoróns ou a ese asado que tan ben lle sae a mamá-ou a papá; se cadra o que ule é o papel de envolver os agasallos, ou o viño que caeu no mantel, ou a cera das candeas que poñemos para decorar a mesa. Non sei, ¿por que non nolo contas?. Na biblioteca tamén queremos ser parte desta festa e queremos que nos adornes a nosa particular árbore de Nadal. ven á biblio, colle unha bola de papel e segue as insrucións que aquí tes. A escribir e... moita sorte.
Os Olores de Nadal

Fotos das lecturas contra a violencia de xénero

Velaquí tedes as fotos das lecturas que o pasado 25 de novembro realizamos no corredor ao lado da biblioteca sobre este terrible tema. Queremos dar as grazas aos rapaces que participaron pola súa boa actuación e por contribuír á concienciación sobre esta lacra na nosa comunidade escolar. Grazas tamén aos que se achegaron a escoitar os relatos e aos que amosaron algún interés polos libros que formaron parte destas emotivas lecturas. Mantemos a esperanza de ter aportado un pequeno gran de area para que estas actitudes desaparezan da nosa sociedade.

LECTURAS CONTRA A VIOLENCIA DE XÉNERO

Como todos os anos queremos contribuír dende a nosa biblioteca a difundir unha mensaxe de respecto ao ser humano , e en especial ás mulleres que sofren da violencia doméstica ou calquera outro tipo de abuso pola súa condición de "sexo débil" e por iso o vindeiro 25 de novembro , no recreo ,faremos unha serie de lecturas de textos que dalgún xeito reflicten este terrible problema. Gustaríanos que compartises connosco ese momento e que servirades de mensaxeiros para espallar este sentimento de rexeitamento.

Robert Louis Stevenson: Aniversario do seu nacemento.

"O importante non é chegar senon ir" Cunha das súas citas queremos dende a nosa biblioteca homenaxear a este escritor escocés ( Edimburgo ,13 de novembro de1850-3 de decembro de 1894) cando se fan 160 anos do seu nacemento. Escritor de inmortais novelas de aventuras como A Illa do Tesouro ou de misterio como O estraño caso do Dr. Jekyll e Mr Hyde, segue a ser, nesta época de revolución tecnolóxica un dos escritores máis lidos polos nosos lectores, tanto en inglés, como en galego ou castelán. Paga a pena seguir gozando das súas obras.

Aquí tamén tes unha pequena presentación coas portadas das obras que podes atopar na nosa biblio.

O Samaín na Biblioteca

É verdade, pasamos mooooooito medo, e mesmo rimos ás gargalladas con algunha das vosas interpretacións. O ambiente na biblio era arrepiantemente simpático e creo que estas fotos que publicamos amosan perfectamente o que fixemos. O ano que vén máis...